ਬਰਨਬੀ:ਲੌਰੇਂਸ ਸਿੰਘ, ਜੋ ਕਿ ਨਿਊ ਵੈਸਟਮਿੰਸਟਰ—ਬਰਨਬੀ—ਮੈਲਾਰਡਵਿਲ ਵਿੱਚ ਕਨਜ਼ਰਵੇਟਿਵ ਪਾਰਟੀ ਵਲੋਂ ਚੋਣ ਲੜ ਰਹੇ ਸਨ, ਉਹਨਾਂ ਦਾ ਕਹਿਣਾ ਹੈ ਕਿ ਉਨ੍ਹਾਂ ਨੂੰ 2021 ਵਿੱਚ ਇੱਕ ਪੌਡਕਾਸਟ ਵਿੱਚ ਚੀਨੀ ਸਰਕਾਰ ਬਾਰੇ ਦਿੱਤੇ ਬਿਆਨ ਕਰਕੇ ਪਾਰਟੀ ਨੇ ਹਟਾ ਦਿੱਤਾ। ਸਿੰਘ ਨੇ ਕਿਹਾ ਕਿ ਉਨ੍ਹਾਂ ਦੇ ਬੋਲਣ ਦਾ ਮਤਲਬ ਸੀ ਕਿ ਹਰ ਦੇਸ਼ ਲਈ ਵੱਖ-ਵੱਖ ਸਰਕਾਰਾਂ ਦੇ ਤਰੀਕੇ ਕੰਮ ਕਰ ਸਕਦੇ ਹਨ, ਪਰ ਪਾਰਟੀ ਨੇ ਇਹ ਗੱਲ ਚੀਨ ਵਿਰੁੱਧ ਆਪਣੇ ਰੁਖ ਦੇ ਉਲਟ ਮੰਨੀ।
ਉਹ ਕਹਿੰਦੇ ਹਨ ਕਿ ਉਨ੍ਹਾਂ ਨੇ 14,000 ਘਰਾਂ ‘ਤੇ ਦਸਤਕ ਦਿੱਤੀ ਸੀ ਅਤੇ ਲੋਕਾਂ ਤੋਂ ਚੰਗਾ ਸਹਿਯੋਗ ਮਿਲ ਰਿਹਾ ਸੀ, ਪਰ 1 ਅਪ੍ਰੈਲ ਨੂੰ ਇੱਕ ਛੋਟੀ ਫੋਨ ਕਾਲ ਰਾਹੀਂ ਉਨ੍ਹਾਂ ਨੂੰ ਕਹਿ ਦਿੱਤਾ ਗਿਆ ਕਿ ਉਨ੍ਹਾਂ ਦੀ ਉਮੀਦਵਾਰੀ ਖਤਮ ਕੀਤੀ ਜਾ ਰਹੀ ਹੈ। ਸਿੰਘ ਨੇ 450 ਹਸਤਾਖਰਾਂ ਵਾਲੀ ਪਟੀਸ਼ਨ ਭੇਜੀ ਪਰ ਕੋਈ ਜਵਾਬ ਨਹੀਂ ਆਇਆ। ਹੁਣ ਉਹ ਆਜ਼ਾਦ ਉਮੀਦਵਾਰ ਵਜੋਂ ਚੋਣ ਲੜ ਰਹੇ ਹਨ।
ਉਸ ਸੀਟ ਲਈ ਹੁਣ ਇੰਦੀ ਪੰਛੀ ਨਵੇਂ ਕਨਜ਼ਰਵੇਟਿਵ ਉਮੀਦਵਾਰ ਵਜੋਂ ਸਾਹਮਣੇ ਆਏ ਹਨ। ਸਿੰਘ ਦਾ ਕਹਿਣਾ ਹੈ ਕਿ ਇਤਨੀ ਦੇਰ ਵਿੱਚ ਉਮੀਦਵਾਰ ਬਦਲਣਾ ਠੀਕ ਨਹੀਂ, ਕਿਉਂਕਿ ਉਨ੍ਹਾਂ ਨੇ ਪਹਿਲਾਂ ਹੀ ਚੋਣ ਲਈ ਕਾਫੀ ਕੰਮ ਕਰ ਲਿਆ ਸੀ। ਇਹ ਮਾਮਲਾ ਹੋਰ ਉਮੀਦਵਾਰਾਂ ਨਾਲ ਵੀ ਵਾਪਰ ਰਿਹਾ ਹੈ, ਜਿੱਥੇ ਦੋਨੋ ਕਨਜ਼ਰਵੇਟਿਵ ਅਤੇ ਲਿਬਰਲ ਪਾਰਟੀਆਂ ਨੇ ਆਪਣੇ ਉਮੀਦਵਾਰ ਵਿਵਾਦਤ ਬਿਆਨਾਂ ਕਰਕੇ ਹਟਾਏ ਹਨ।