ਓਟਵਾ:ਏਅਰ ਕੈਨੇਡਾ ਦੇ ਫਲਾਈਟ ਅਟੈਂਡੈਂਟਸ ਦੀ ਨੁਮਾਇੰਦਗੀ ਕਰਨ ਵਾਲੀ ਯੂਨੀਅਨ ਨੇ ਕਿਹਾ ਹੈ ਕਿ ਮੈਂਬਰ ਕੰਮ ‘ਤੇ ਵਾਪਸ ਨਹੀਂ ਜਾਣਗੇ, ਭਾਵੇਂ ਫੈਡਰਲ ਲੇਬਰ ਬੋਰਡ ਨੇ ਹੜਤਾਲ ਨੂੰ ਗੈਰਕਾਨੂੰਨੀ ਕਰਾਰ ਦਿੱਤਾ ਹੈ। CUPE ਦੇ ਪ੍ਰਧਾਨ ਮਾਰਕ ਹੈਨਕੌਕ ਨੇ ਕਿਹਾ ਕਿ ਜੇਲ੍ਹ ਜਾਂ ਜੁਰਮਾਨੇ ਵੀ ਭੁਗਤਣੇ ਪਏ ਤਾਂ ਵੀ ਯੂਨੀਅਨ ਹੜਤਾਲ ਜਾਰੀ ਰੱਖੇਗੀ। ਜ਼ਿਕਰਯੋਗ ਹੈ ਕਿ ਕੈਨੇਡਾ ਦੀ ਲੇਬਰ ਟ੍ਰਿਬਿਊਨਲ ਨੇ ਏਅਰ ਕੈਨੇਡਾ ਦੇ 10,000 ਫਲਾਈਟ ਅਟੈਂਡੈਂਟਾਂ ਦੀ ਹੜਤਾਲ ਨੂੰ ਗੈਰਕਾਨੂੰਨੀ ਕਰਾਰ ਦਿੱਤਾ ਹੈ ਅਤੇ ਉਹਨਾਂ ਨੂੰ ਤੁਰੰਤ ਕੰਮ ‘ਤੇ ਵਾਪਸ ਜਾਣ ਦਾ ਆਦੇਸ਼ ਦਿੱਤਾ ਹੈ। ਕੈਨੇਡੀਅਨ ਯੂਨਿਅਨ ਆਫ ਪਬਲਿਕ ਐਮਪਲੋਈਜ਼ (CUPE) ਨੇ ਪਹਿਲਾਂ ਦਿੱਤੇ ਬੈਕ-ਟੂ-ਵਰਕ ਆਦੇਸ਼ ਨੂੰ ਅਣਡਿੱਠਾ ਕੀਤਾ, ਜਿਸ ਕਾਰਨ ਫੈਡਰਲ ਜੌਬਜ਼ ਮਿਨਿਸਟਰ ਪੈਟੀ ਹਾਈਡੂ ਨੇ ਦਖ਼ਲ ਕਰਦਿਆਂ ਬਾਇੰਡਿੰਗ ਆਰਬਿਟ੍ਰੇਸ਼ਨ ਲਈ ਮੰਗ ਕੀਤੀ ਤਾਂ ਜੋ ਉਦਯੋਗਿਕ ਸ਼ਾਂਤੀ ਬਣਾਈ ਜਾ ਸਕੇ। ਫਲਾਈਟ ਅਟੈਂਡੈਂਟਾਂ ਨੇ ਸ਼ਨੀਵਾਰ ਸਵੇਰੇ ਕੰਮ ਛੱਡ ਦਿੱਤਾ, ਜਿਸ ਨਾਲ ਸੈਂਕੜੇ ਫਲਾਈਟਾਂ ਰੱਦ ਹੋਈਆਂ ਅਤੇ ਲਗਭਗ 500,000 ਗ੍ਰਾਹਕ ਪ੍ਰਭਾਵਿਤ ਹੋਏ। ਏਅਰ ਕੈਨੇਡਾ ਅਤੇ CUPE ਮਾਰਚ ਵਿੱਚ ਪਿਛਲੇ 10 ਸਾਲਾਂ ਦੇ ਠੇਕੇ ਦੇ ਖ਼ਤਮ ਹੋਣ ਤੋਂ ਬਾਅਦ ਨਵੇਂ ਠੇਕੇ ਬਾਰੇ ਚਰਚਾ ਕਰ ਰਹੇ ਹਨ, ਜਿਸ ਵਿੱਚ ਮਜ਼ਦੂਰੀ, ਕੰਮ ਦੇ ਨਿਯਮ ਅਤੇ ਭੁਗਤਾਨ ਨਾ ਕੀਤੇ ਘੰਟਿਆਂ ਨੂੰ ਲੈ ਕੇ ਵਿਵਾਦ ਹਨ। ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਨੇ ਤੁਰੰਤ ਹੱਲ ਅਤੇ ਅਟੈਂਡੈਂਟਾਂ ਲਈ ਵਧੀਆ ਤਨਖਾਹ ਦੀ ਮੰਗ ਕੀਤੀ।